GoldPlanar GL20 係隻平板耳機，而且係開放式，即係話基本上係喺屋企先會聽。係用黎細味既耳機。隻耳機喺大陸都幾多人討論，話聲音好細膩隻耳機唔算貴，而我加左錢要埋佢條銅線,隻耳機膠感好重，而我都明白。因為隻耳機好大隻，28mm既單元，勁大。如果個殼唔係膠，會好重。

佢淘寶寫係turbo 設計，幾有趣。首先隻耳機黎到，我直接用2.5線，m11pro 直推，我唔係咁滿意，有少少模糊。我問賣家，佢叫我煲煲，我就煲左五日之後先聽。聲音真係好左好多。 好少感受到一隻耳機煲後既進步會咁大，莫非因為平板單元？聲音好左之後就有另一問題，亦係好多人喺內地同淘寶講既問題。

因為隻耳機好大，而個導管幼而長，所以用佢原本既耳膠，係唔穩。

上網睇有人戴兩節膠 解決左問題。而我就試左jvc ++ , spinfit 100, aet 07, 08, final type e,最後發現type E 最大size 係幾fit , 粒膠又肥又脹又短，所以塞滿個耳腔。終於可以好好享受隻耳機。我用m11pro 2.5直推，聲音好有趣，係HIFI大喇叭比你既感覺。同一般iem唔同，入耳通常會有一種壓迫感，而人聲就好似喺你耳邊唱一樣。但喇叭就係比你一種置身現場既自然通透感。

呢隻GL20, 開放式平板竟然有呢個感覺。低頻厚但唔會over , 中頻人聲順滑，聽得好舒服。而高頻相對暗少少，但換左線又可以改善到。

聽左幾日，我試下落埋amp, 我頂，原來amp既提升又係可以咁大。平時啲入耳落amp通常都係自high, 提升冇話好明顯。

但呢隻平板，好食力，落埋amp個層次分析力再提高。

第一次玩平板，比到我一個好大既感受，原來煲機，同amp可以提升一隻耳機咁多。玩左咁耐入耳，睇黎又要重新學過哈哈!